HomeSportနာမည်ကြီးဘောလုံးအသင်းများနဲ့ ချန်ပီယံအိပ်မက် လွဲချော်မှုများ။

နာမည်ကြီးဘောလုံးအသင်းများနဲ့ ချန်ပီယံအိပ်မက် လွဲချော်မှုများ။

- Advertisement -

ဖီအိုရင်တီးနား (၁၉၉၈-၉၉)

ပက်ထရာတိုနီနည်းပြနေစဉ် (၁၉၉၈-၉၉) ခုနှစ် ဘောလုံးရာသီ၌ ဖီအိုရင်တီးနားအသင်းသည် နှစ်ပေါင်း (၃၀) ကျော်ကြာ ဝေးကွာနေတဲ့ စကူဒက်တိုချန်ပီယံဆုကိုရရှိရန် အနီးစပ်ဆုံးအနေအထားကို ရောက်ရှိခဲ့ပါတယ်။ ဖေဖော်ဝါရီလ နှောင်းပိုင်းကာလအထိ ဖီအိုရင်တီးနားအသင်းက အမှတ်ပေးဇယားထိပ်ဆုံး၌ ရပ်တည်နေပြီး ဘတ်တစ္စတူတာက အသင်းအတွက် ပထမဆုံး (၁၃) ပွဲမှာ (၁၃) ဂိုးသွင်းယူပေးထားနိုင်ခဲ့ပါတယ်။

ဒါပေမယ့် အဆိုပါ ကစားသမား ဒဏ်ရာရရှိချိန်မှစတင်ကာ ဖီအိုရင်တီးနားအသင်းဟာ အခက်အခဲများနဲ့ ရင်ဆိုင်ခဲ့ရပြီး နောက်ဆုံး (၁၁) ပွဲ၌ (၂) ပွဲသာ အနိုင်ရရှိခဲ့ပါတယ်။ ရာသီကုန်ချိန်၌မူ ဖီအိုရင်တီးနားအသင်းအနေနဲ့ အဆင့် (၃) နေရာ၌သာ ရပ်တည်ခဲ့ရပြီး စကူဒက်တိုချန်ပီယံဆုနဲ့ လွဲချော်ခဲ့ရပါတယ်။ အဆိုပါရာသီ၌ ဖီအိုရင်တီးနားအသင်းက ကိုပါအီတလီယာဖလားဗိုလ်လုပွဲကို တက်ရောက်နိုင်ခဲ့ပေမယ့် ပါးမားအသင်းကို ဗိုလ်လုပွဲ၌ နှစ်ကျော့ပေါင်းရလဒ် အဝေးဂိုးဖြင့် ရှုံးနိမ့်ခဲ့ပြီး လက်ရှိအချိန်ထိလည်း စီးရီးအေအမှတ်ပေးဖလားကို ရရှိရန် စောင့်ဆိုင်းနေရဆဲဖြစ်ပါတယ်။

- Advertisement -

 

- Advertisement -

လေဗာကူဆင် (၂၀၀၁-၀၂)

နည်းပြ Klaus Toppmoller လက်ထက်၌ လေဗာကူဆင်အသင်းသည် ရာသီကုန်ဆုံးရန် (၃) ပွဲအလိုမှာ ဒုတိယနေရာမှ ဒေါ့မွန်အသင်းကို (၅) မှတ်ဖြတ်ကာ အမှတ်ပေးဇယားကို ဦးဆောင်ထားသည့်အပြင် ဂျာမန်ပိုကယ်ဖလားနဲ့ချန်ပီယံလိဂ် ပြိုင်ပွဲနှစ်ခုလုံး၌ ဗိုလ်လုပွဲအဆင့်ကို တက်ရောက်ထားနိုင်ပါတယ်။ လူငယ်ကစားသမားဖြစ်သူူ မိုက်ကယ်ဘားလက်က အတောက်ပဆုံးခြေစွမ်းကို ပြသနေပြီး ကွင်းလယ်ကစားသမားတစ်ယောက်ပင်ဖြစ်သော်ငြား အသင်းအတွက် (၁၇) ဂိုးသွင်းယူပေးထားနိုင်ပါတယ်။

ဒါပေမယ့် အသင်းရဲ့ အဓိက ခံစစ်ကစားသမားဖြစ်သူ Nowotny ဒဏ်ရာရရှိခဲ့ပြီးနောက် လက်ကျန်ဘွန်ဒက်စ်လီဂါ (၃) ပွဲမှာ (၂) ပွဲရှုံးနိမ့်ခဲ့ပြီး အမှတ်ပေးချန်ပီယံဆုကို ဒေါ့မွန်အသင်းထံ လွှဲပေးခဲ့ရပါတယ်။ ဂျာမန်ပိုကယ်ဖလား ဗိုလ်လုပွဲ၌လည်း ရှော်လ်ကေးအသင်းကို တစ်ဂိုးဂိုးမရှိဖြင့် ရှုံးနိမ့်ခဲ့ပြီး ဆုဖလားကို လက်လွှတ်ခဲ့ရသလို ချန်ပီယံလိဂ်ဗိုလ်လုပွဲ၌လည်း ချန်ပီယံဆုနဲ့ အနီးစပ်ဆုံးအနေအထားအထိ ရောက်ရှိပြီးမှ ရီးရဲယ်မက်ဒရစ်အသင်းကို နှစ်ဂိုးတစ်ဂိုးနဲ့ ရှုံးနိမ့်ကာ လွဲချော်ခဲ့ရပါတယ်။

 

ဘိုင်ယန်မြူးနစ် (၂၀၁၁-၁၂)

ဂျက်ဟေးနက်စ်ရဲ့ ဘိုင်ယန်မြူးနစ်အသင်းသည် ရာသီအစဘွန်ဒက်စ်လီဂါပွဲဦးထွက် (၇) ပွဲ၌ (၆) ပွဲအနိုင်ရရှိခဲ့ပြီး အကောင်းဆုံးတာထွက်နိုင်ခဲ့ပါတယ်။ ဒါပေမယ့် ယာဂင်ကလော့ပ်ရဲ့ ဒေါ့မွန်အသင်းက အကောင်းဆုံးပုုံစံရရှိနေခဲ့ပြီး (၂၈) ပွဲဆက်တိုက် ရှုံးပွဲမရှိစံချိန်နဲ့ ခရီးဆက်နိုင်ခဲ့တာကြောင့် ဘိုင်ယန်မြူးနစ်တို့ ချန်ပီယံဆုနဲ့ လွဲွချော်ခဲ့ရပါတယ်။ ဒါ့အပြင် ဂျာမန်ပိုကယ်ဖလားပြိုင်ပွဲမှာလည်း ဘိုင်ယန်မြူးနစ်အသင်းက ဒေ့ါမွန်အသင်းကို ငါးဂိုးနှစ်ဂိုးနဲ့ ရှုံးနိမ့်ခဲ့ပါသေးတယ်။

အိမ်ကွင်းအလိုင်းယန့်ဇ်အရီနာကွင်းကြီး၌ လက်ခံယှဉ်ပြိုင်ကစားခွင့်ရရှိခဲ့သည့် ချန်ပီယံလိဂ်ဗိုလ်လုပွဲကြီး၌လည်း ချဲလ်ဆီးအသင်းကို ရှုံံးနိမ့်ခဲ့ရပြီး ချန်ပီယံလိဂ်ဖလားကိုထပ်မံလက်လွှတ်ခဲ့ရပါတယ်။ သောမတ်စ်မူလာက အသင်းအတွက် နောက်ကျဦးဆောင်ဂိုးသွင်းယူနိုင်ခဲ့ပေမယ့် ချဲလ်ဆီးအသင်းရဲ့ တိုက်စစ်မှူး ဒရော့ဘာရဲ့ ချေပဂိုးကို ပြန်လည်ခွင့်ပြုခဲ့ရပါတယ်။ ညာတောင်ပံ ကစားသမား ရော်ဘင်ရဲ့ အချိန်ပိုမှာ ပင်နယ်တီလွဲချော်ခဲ့ခြင်းနဲ့အတူ ပင်နယ်တီအဆုံးအဖြတ်မှာ ရှုံးနိမ့်ခဲ့တာကြောင့် ဘိုင်ယန်မြူးနစ်တို့အတွက် ကံဆိုးခဲ့တဲ့ ဘောလုံးရာသီတစ်ခုဟု ပြောရမှာလည်း ဖြစ်ပါတယ်။

 

- Advertisement -

အာဆင်နယ် (၁၉၉၈-၉၉)

ယူနိုက်တက်အသင်းရဲ့ သမိုင်းဝင်အောင်မြင်မှုဖြစ်သည့် ဖလား (၃) လုံးရရှိခဲ့သည့် (၁၉၉၈-၉၉) ခုနှစ် ဘောလုံးရာသီက အာဆင်နယ်အသင်းအတွက် အကြီးအကျယ် ကံဆိုးမိုးမှောင်ကျခဲ့သည့့် ဘောလုံးရာသီလည်း ဖြစ်ပါတယ်။ FA ဖလားဆီမီးဖိုင်နယ်၌ အာဆင်နယ်အသင်းသည် ယူနိုက်တက်အသင်းနဲ့ထိပ်တိုက်တွေ့ခဲ့ပြီး ပွဲပြီးဆုံရန် (၁၆) မိနစ်အလို၌ ယူနိုက်တက်အသင်းခေါင်းဆောင် ရွိုင်ကိန်းအထုတ်ခံရတာကြောင့် လက်ကျန်ပွဲကစားချိန်ကို အာဆင်နယ်တို့ တစ်ယောက်အသာနဲ့ကစားခဲ့ရပါတယ်။ ဒါပေမယ့် အာဆင်နယ်အသင်းက အခွင့်အရေးအများအပြားကို ဖြုန်းတီးပစ်ခဲ့ပြီး ပွဲကစားချိန် နောက်ဆုံးမိနစ်တွင်လည်း ဘားကမ့်က ပင်နယ်တီလွဲချော်ခဲ့တာကြောင့် ယူနိုက်တက်အသင်းကို ရှုံးနိမ့်ကာ ပြိုင်ပွဲကထွက်ခဲ့ရပါတယ်။

ပရီးမီးယားလိဂ်ပြိုင်ပွဲတွင်လည်း ယူနိုက်တက်အသင်းက လက်ကျန်ပွဲစဉ် (၂) ပွဲလုံးကို အနိုင်ကန်ပြီး အာဆင်နယ်အသင်းရဲ့ ရှုံးပွဲကို အခွင့်ကောင်းယူကာ ပရီးမီးယားလိဂ်ဖလားကို ရရှိသွားခဲ့ပါတယ်။

 

ဂျူဗင်တပ်စ် (၁၉၉၁-၉၂)

(၁၉၉၀) ပြည့်နှစ်များ၌ မီလန်မြို့ရဲ့ လွှမ်းမိုးမှုကို ဖောက်ထွက်ရန် ဂျူဗင်တပ်စ်အသင်းက ရောဘတ်တိုဘက်ဂီယိုကို ထိုစဉ်က ကမ္ဘာ့စံချိန်တင်ပြောင်းရွှေ့ကြေးဖြစ်သည့် ပေါင် (၈) သန်းနဲ့ခေါ်ယူခဲ့ပါတယ်။ ဒါ့အပြင် ဂျာမနီလက်ရွေးစင်အသင်းနဲ့အတူ ကမ္ဘာ့ဖလားကို ရယူနိုင်ခဲ့သည့် ခိုလာ နဲ့ ရိုက်တာတို့ကိုလည်း ခေါ်ယူအားဖြည့်ခဲ့ပါတယ်။

စီးရီးအေပွဲစဉ် (၂၅) ရောက်သည့်အချိန်အထိ ဂျူဗင်တပ်စ်အသင်းက အမှတ်ပေးဇယားကို ဦးဆောင်ထားပြီး ဘက်ဂီယိုကလည်း အသင်းအတွက် (၁၈) ဂိုးသွင်းယူကာ ခြေစွမ်းပြနေခဲ့ပါတယ်။ ဒါပေမယ့် ဂျူဗင်တပ်စ်အသင်းက လက်ကျန် ပွဲစဉ် (၉) ပွဲမှာ နိုင်ပွဲ (၂) ပွဲသာ ရရှိခဲ့ပြီး အမှတ်ပေးချန်ပီယံဆုဖလားကို လက်လွှတ်ခဲ့ရပါတယ်။ ကိုပါအီတလီယာဖလားပြိုင်ပွဲ၌လည်း ပါးမားအသင်းကို နှစ်ကျော့ပေါင်းရလဒ် နှစ်ဂိုးတစ်ဂိုးနဲ့ ရှုံးနိမ့်ခဲ့ရသည့် ဂျူဗင်တပ်စ်အသင်းသည် ပြည်တွင်းပြိုင်ပွဲများ၌ အောင်မြင်မှုရရှိရန်အတွက် (၁၉၉၅) ခုနှစ်အထိ စောင့်ဆိုင်းခဲ့ရပါတယ်။

 

ဘာစီလိုနာ (၁၉၉၉-၂၀၀၀)

လူးဝစ်ဗန်ဟားလ်ကိုင်တွယ်နေခဲ့သည့် ဘာစီလိုနာအသင်းက တီကီတာကာကစားကွက်နဲ့အတူ လူးဝစ်ဖီဂို၊ ပက်ထရစ်ကလွိုက်ဗက် နဲ့ ရီဗယ်လ်ဒိုတို့လည်း ရုန်းကန်ခဲ့ရပါတယ်။ ဘရာဇီးဘောလုံးအကျော်အမော် ရီဗယ်လ်ဒိုကိုလည်း သူ့ရဲ့ပုံမှန်ကစားနေကျ နေရာမဟုတ်သည့် ကွင်းလယ်တိုက်စစ်နေရာမှာ ကစားစေခဲ့သည့် လူးဝစ်ဗန်ဟားလ်ရဲ့ ဘာစီလိုနာအသင်းသည် နောက်ပိုင်းပွဲစဉ်များ၌မူ ဆက်တိုက်ဆိုသလို ရုန်းကန်ခဲ့ရပါတယ်။ ကိုပါဒယ်ရေးဖလားနဲ့ ချန်ပီယံလိဂ်ပြိုင်ပွဲများ၌ ဆီမီးဖိုင်နယ်အဆင့်အထိ တက်ရောက်နိုင်ခဲ့သည့် ဘာစီလိုနာအသင်းသည် အဆိုပါ ပြိုင်ပွဲနှစ်ခုလုံးမှထွက်ခွာခဲ့ရသည့်အပြင် စပိန်လာလီဂါချန်ပီယံဆုကိုလည်း ဒုတိယနေရာက ဒီပို့တီဗိုအသင်းထံလွှဲပြောင်းပေးခဲ့ရပါတယ်။

 

ဘော်ဒိုး (၂၀၀၉-၁၀)

လောရင့်ဘလန့်နည်းပြနေသည့် ဘော်ဒိုးအသင်းသည် (၂၀၀၉) ခုနှစ်၌ ပြင်သစ်လီဂူးအမှတ်ပေးဖလားကို ဆွတ်ခူးနိုင်ရန် နီးစပ်ခဲ့ပေမယ့် ရာသီကုန်ချိန်၌မူ လိုင်ယွန်အသင်းကသာ အမှတ်ပေးချန်ပီယံဆုကို ရရှိသွားခဲ့ပါတယ်။ ဂေါ်ကပ်ဖ်၊ ချာမက်တို့ရဲ့ ခြေစွမ်းပြမှုများနဲ့အတူ ရာသီနှောင်းပိုင်းအချိန်ကာလ၌ လိုင်ယွန်အသင်းက (၇) ပွဲဆက်နိုင်ပွဲရယူကာ အမှတ်ပေးချန်ပီယံဆုကို ရရှိခဲ့ခြင်းလည်း ဖြစ်ပါတယ်။

ဘော်ဒိုးအသင်းသည် ချန်ပီယံလိဂ်ပြိုင်ပွဲ အုပ်စုအဆင့်၌လည်း ဂျူဗင်တပ်စ် ဘိုင်ယန်မြူးနစ်အသင်းများရဲ့အထက် အုပ်စုပထမနေရာတွင် ရပ်တည်နိုင်ခဲ့ကာ ကွာတားဖိုင်နယ်အဆင့်ထိ တက်ရောက်နိုင်ခဲ့ပေမယ့် ပြည်တွင်းပြိုင်ဘက် လိုင်ယွန်အသင်းကို ရှုံးနိမ့်ပြီး ပြိုင်ပွဲက ထွက်ခဲ့ရပါတယ်။ ပြည်တွင်းဖလားပြိုင်ပွဲ၌လည်း မာဆေးလ်အသင်းကို ဗိုလ်လုပွဲ၌ သုံးဂိုးတစ်ဂိုးနဲ့ ရှုံးနိမ့်ခဲ့သလို အမှတ်ပေးပြိုင်ပွဲ၌လည်း အခြေအနေဆိုးများနဲ့ ဆက်တိုက်ရင်ဆိုင်ခဲ့ရကာ (၃) ပွဲဆက်ရှုံးပွဲနဲ့အတူ ယူရိိုပါလိဂ်ဝင်ခွင့်နဲ့ပင် လွဲချော်ခဲ့ရတာလည်းဖြစ်ပါတယ်။

 

ဘင်ဖီကာ (၂၀၁၂-၁၃)

(၂၀၁၃) ခုနှစ် မေလကတော့ ဘင်ဖီကာအသင်းအတွက် မေ့မရနိုင်သည့် အချိန်ကာလပင်ဖြစ်ပါတယ်။ ပေါ်တူဂီအမှတ်ပေးဖလားပြိုင်ပွဲအတွက် အဆုံးအဖြတ်ပွဲစဉ်တစ်ခုအဖြစ် သတ်မှတ်လို့ရသည့် အဆိုပါ ပွဲစဉ်၌ ဘင်ဖီကာအသင်းအနေနဲ့ ပေါ်တိုအသင်းကို နှစ်ဂိုးတစ်ဂိုးနဲ့ ရှုံးနိမ့်ကာ အမှတ်ပေးချန်ပီယံဆုကို လက်လွှတ်ခဲ့ရသလို ပြည်တွင်းဖလားပြိုင်ပွဲ၌လည်း ဗစ်တိုးရီးယားဂွီမာရက်စ်အသင်းကိုလည်း ပွဲကစားချိန် နောက်ဆုံး မိနစ် (၁၁) အတွင်း နှစ်ဂိုးပေးခဲ့ရကာ ပွဲအပြီး၌ နှစ်ဂိုးတစ်ဂိုးနဲ့ ရှုံးနိမ့်ကာ နောက်ထပ်ဖလားတစ်လုံးကို လက်လွှတ်ခဲ့ရပါတယ်။

ယူရိုပါလိဂ်ပြိုင်ပွဲရဲ့ ဗိုလ်လုပွဲအဆင့်ကို တက်ရောက်နိုင်ခဲ့သည့် ဘင်ဖီကာအသင်းသည် ချဲလ်ဆီးအသင်းနဲ့ ထိပ်တိုက်ရင်ဆိုင်ခဲ့ရပြီး ပြိုင်ဘက်ချဲလ်ဆီးအသင်း နောက်ခံလူ အီဗန်နိုဗစ်ရဲ့ နောက်ကျခေါင်းတိုက်သွင်းဂိုးကြောင့် တစ်ဂိုးဂိုးမရှိနဲ့ ရှုံးနိမ့်ခဲ့ရပြီး ဆုဖလား (၃) လုံးမျှော်လင့်ချက်ကို စွန့်လွှတ််ခဲ့ရပြီး ဖလားလက်မဲ့အဖြစ်နဲ့သာ ဘောလုံးရာသီကို ကုန်ဆုံးခဲ့ရပါတယ်။

 

အေဂျက်စ် (၂၀၁၆-၁၇)

ပြည်တွင်းပြိုင်ပွဲ၌ လူငယ်ကစားသမားအများစုဖြင့် စုဖွဲ့ထားသည့် အေဂျက်စ်အသင်းသည် ဖီယင်နုအသင်းနဲ့ အပြိုင်အမှတ်ပေးဖလားကို ဆွတ်ခူးရန် ရေပန်းစားခဲ့ပေမယ့် ချန်ပီယံဆုအတွက် အရေးကြီးသည့် အဆုံးအဖြတ်ကာလများ၌ လူငယ်ကစားသမားများရဲ့ အတွေ့အကြုံနုနယ်မှုက သိသာထင်ရှားခဲ့ပြီး အမှတ်ပေးဖလားနဲ့ လွဲချော်ခဲ့ရပါတယ်။ ယူရိုပါလိဂ်ပြိုင်ပွဲ၌လည်း ဗိုလ်လုပွဲအဆင့်အထိ ရောက်ရှိခဲ့ပေမယ့် ဥရောပဝါရင့် ယူနိုက်တက်အသင်းနဲ့ ရင်ဆိုင်ခဲ့ရပြီး နှစ်ဂိုးဂိုးမရှိနဲ့ ရှုံးနိမ့်ကာ ချန်ပီယံဆုကို ထပ်မံလက်လွှတ်ခဲ့ရပါတယ်။

 

ဆဲလ်တစ် (၂၀၀၂-၀၃)

(၁၉၇၀) ခုနှစ်နောက်ပိုင်း ပထမဆုံးအကြိမ်အဖြစ် ယူရိုပါလိဂ်(ထိုစဉ်က UEFA Cup) ပြိုင်ပွဲရဲ့ ဗိုလ်လုပွဲအဆင့်ကို တက်ရောက်နိုင်ခဲ့သည့် ဆဲလ်တစ်အသင်းသည် ပြည်တွင်းအမှတ်ပေးပြိုင်ပွဲ၌လည်း ရိန်းဂျားစ်အသင်းနဲ့အပြိုင် ဖြစ်နေသလို စကော့တလန်ပြည်တွင်းဖလားရဲ့ ဗိုလ်လုပွဲအဆင့်ကိုလည်း တက်ရောက်ထားနိုင်ခဲ့ပါတယ်။ ဒါပေမယ့် ပြည်တွင်းဖလားဗိုလ်လုပွဲ၌ အဲလက်စ်မက်လစ်ရှ် ကိုင်တွယ်နေသည့် ရိန်းဂျားစ်အသင်းကို နောက်ဆုံးမိနစ် ပင်နယ်တီလွဲချော်မှုနဲ့အတူ နှစ်ဂိုးတစ်ဂိုးနဲ့ ရှုံးနိမ့်ခဲ့ချိန်မှစတင်ပြီး ကံဆိုးမှုများ စတင်ခဲ့သည့် ဆဲလ်တစ်အသင်းသည် ချန်ပီယံလိဂ်ပြိုင်ပွဲ၌လည်း ထိုစဉ်က မော်ရင်ဟိုကိုင်တွယ်နေသည့် ပေါ်တိုအသင်းကို ဗိုလ်လုပွဲ၌ အချိန်ပိုအထိ ကစားခဲ့ရပြီးမှ သုံးဂိုးနှစ်ဂိုးနဲ့ရှုံးနိမ့်ကာ ချန်ပီယံဆုနဲ့ လွဲချော်ခဲ့ပါတယ်။ အမှတ်ပေးပြိုင်ပွဲ၌လည်း နောက်ဆုံးအချိန်အထိ ယှဉ်ပြိုင်ခဲ့ရပြီး နောက်ဆုံးပွဲစဉ်၌ ကီလ်မာနော့အသင်းကို လေးဂိုးဂိုးမရှိဖြင့် အနိုင်ရရှိခဲ့ပေမယ့် ရိန်းဂျားစ်အသင်းနဲ့ ဂိုးကွာခြားချက် (၁) ဂိုးအကွာနဲ့ အမှတ်ပေးချန်ပီယံဆုကို လက်လွှတ်ခဲ့ရပါတယ်။

<Unicode Version>

#soshwe

#soshwesport

#soshweforyourdailylife

#likeandshare

- Advertisement -

LEAVE A REPLY

Please enter your comment!
Please enter your name here

8 + eleven =

Must Read

အမျိုးသားများနဲ့ အမျိုးသမီးများကို တန်းတူညီမျှ အခွင့်အရေးပေးသော နိုင်ငံများအကြောင်း။

ကမ္ဘာကြီးမှာ အမျိုးသားတွေနဲ့ အမျိုးသမီးတွေဟာ နေ့စဉ်နဲ့အမျှ တန်းတူညီမျှ ရင်ဘောင်တန်းပြီး သွားလာလှုပ်ရှားနေကြပါတယ်။ ဒါပေမယ့်လည်း တစ်နိုင်ငံနဲ့တစ်နိုင်ငံ အမျိုးသားနဲ့ အမျိုးသမီးတွေအကြား အခွင့်အရေးတွေ၊ ရပိုင်ခွင့်တွေ မတူညီကြပါဘူး။ ကမ္ဘာ့ဘဏ်ရဲ့ ထုတ်ပြန်ကြေငြာချက်အရ နိုင်ငံ ၆ နိုင်ငံတည်းကသာ အမျိုးသားနဲ့ အမျိုးသမီးတွေကြားမှာ တူညီတဲ့ရပိုင်ခွင့်တွေ သတ်မှတ်ပေးထားကြောင်း လေ့လာတွေ့ရှိရပါတယ်။ လွန်ခဲ့တဲ့...